عروسة نقاوة حمار وحلاوة

عروسه نقاوه ... حمار وحلاوه ,

صباح الخير

صباح النور يا بابا

امال امك فين

بتحضر باقى الفطار

و لما هى لسه بتحضر فى الفطار حضرتك قاعد بتاكل ليه مش تستنى لما كلنا نتلم على السفرة

معلش يا بابا اصلى مستعجل شوية

مستعجل ليه يا اخويا وراك الديوان

لأ اصلى نازل اقابل اصحابى بتوع الكلية بقالنا كتير ما اتقابلناش

تقابل اصحابك و انا اللى كنت فاكرك رايح تدور على شغل

ما انا بادور و الله يا بابا بس انت عارف الظروف

يا نعمة خلصى بسرعة عايز الحق اروح الشغل . و انت خف شوية هو انت داخل سبق
مع طبق البيض ارحم نفسك لسه اخواتك هايفطروا قبل ما يروحوا المدارس

فى ايه يا حسين ما تسيب الواد ياكل

هو انا قلت حاجه ما ياكل بس يرحم شوية لسه اخواته ما فطروش

رايح فين يا حبيبى اقعد كمل اكلك

لا يا ماما شبعت خلاص الحمد لله

شايف اللى عملته فى الواد لازم كده تطفحه كل لقمة ياكلها

انتى هاتقرفينى ليه على الصبح طب و الله ما انا واكل و هاسيب لك البيت تشبعى بيه انتى و المحروس البكرى بتاعك

حسين راح الشغل و رجع مبسوط على غير العاده

ازيك يا نعمة

الحمد لله

طارق رجع و لا لسه

رجع منين ده يا ضنايا بعد ما سميت بدنه بالكلمتين بتوع الصبح و هو من ساعتها حابس نفسه فى اوضته مش عايز يخرج منها

طب خلاص اندهى له عشان اصالحه ده انا جايب له خبر هايخليه يرقص من الفرح

بجد و الله . اوعى يكون ورقه اتقبل فى الشركة عندك

ان شاء الله هايتقبل ده الخبر اللى عندى انقح

خبر ايه فرحنى

جايب له عروسة لكن ايه بقى نقاوة

عروسة ايه يا حسين هو الواد حيلته ابيض و لا اسود و لا عايزة يروح للناس ايد ورا و ايد قدام

و انتى مالك دى عروسة مرتاحه على الاخر

يعنى ايه مرتاحه اوعى تكون كبيرة فى السن

كبيرة ايه هو انا اتجننت هاجوزة واحده كبيرة دى بنوته صغيرة لسه

و البنوته الصغيرة دى هاترضى بابنك و هو عاطل ازاى يعنى

يا ستى اندهي له انتى بس و انا هاحكى لكم على كل حاجه

حاضر

و راحت نعمة ندهت لطارق و حكت له على اللى حسين بيقوله

نعم يا بابا

امك قالت لك طبعا على موضوع العروسة

اه

طب و ايه رأيك

رأيى فى ايه هو انا كنت شوفتها

يا ابنى ايه رأيك فى فكرة الجواز نفسها يعنى عندك استعداد تتجوز

يا بابا انا نفسى اتجوز من بعد ما خدت الاعدادية بس هاجيب منين

من الناحية دى اطمن هى مش محتاجة منك حاجه خالص

يا راجل انت عايز تجننى يعنى ايه مش محتاجه حاجة منه

بصى يا ستى الحكايه انى بعد ما روحت الشغل قولت ادخل للمدير اقوله على ورق
طارق عشان التعيين و قعدت اقوله ان الولد مؤدب و كويس قوى و نفسه يشتغل
عشان يكون نفسه و كده يعنى لقيت الراجل بيسألنى اذا كان طارق خاطب و لا لأ
و لما قولت له انه مش خاطب لمح لى على بنته و انها كل ما يجيلها عريس يطلع
طمعان فيهم و انه نفسه يجوزها لواحد ابن حلال يخللى باله منها

لمح لك ما دام بيدلل عليها تبقى اكيد فيها حاجه مش مظبوطه

يا وليه حرام عليكى طالع لك بنات

انا ما اقصدش حاجه وحشة استغفر الله العظيم انا قصدى اكيد مش حلوة مادام بيدور لها على عريس

و ليه ما تقوليش انه خايف على اللى هايسيبه لها اصلها بنته الوحيدة

الله اعلم بس انا قلبى مش مطمن للموضوع ده

و انت ايه رأيك

مش عارف و الله يا بابا بس كلام ماما يقلق الصراحه

سيبك من كلام امك . انت عارف لو اتجوزت نورا دى هاتبقى انت الكل فى الكل فى الشركة و بكرة تقعد مكان حماك

انت قوام عملته حماه

اسكتى بقى بص يا طارق انت لو فضلت كده عمرك ما هاتعرف تجيب شقة و لا تتجوز فى سنتك . قولت ايه يا ابنى اقول للراجل اننا هانزوره

ماشى يا بابا بس لو طلعت وحشة مش هاتجوزها

ان شاء الله ربنا هايخيب ظن امك و البت هاتطلع كويسة

يا رب يا اخويا و هو انا اكره افرح بيه و اشوفه فى الكوشه جنب عروسته ده يوم المنى

تانى يوم حسين قال للمدير انه هايجيب طارق و هاييجوا يزوروهم فى البيت عشان يتعرفوا على نورا و المدير رحب جدا

طارق قعد هو و باباه فى الصالون

و سعيد بيه المدير قعد يرحب بيهم و يشيد بأخلاق طارق و انه باين عليه مش زى شباب اليومين دول

و باباه يأكد على كلامه و ان حتى السيجارة طارق ما يعرفش طعمها ايه

و قام سعيد بيه يستعجل العروسة

و الله انا خايف نلاقى عائشة الكيلانى داخله علينا

يا ابنى اصبر على رزقك

و دخلت العروسة

يا نهار ابيض دى زى القمر يا واد

ايه ده يا بابا دى حلوة قوى

حلوة بس دى قمر و محجبة كمان يعنى حمار و حلاوة يا رب تكون من نصيبك

يا رب

طارق و نورا قعدوا يتكلموا مع بعض و خدوا على بعض بسرعه

و اول ما وصلوا البيت استقبلتهم نعمة بلهفة

ايه الاخبار

اسألى ابنك

الحمد لله يا ماما

يعنى العروسة عجبتك يا حبيبى

عجبته بس ده كان هايتهبل بيها

بجد و الله . يعنى البنت طلعت حلوة

حلوة بس دى حمار و حلاوة حاجه كده فرز أول

طب و اتفقتوا مع ابوها على ايه

هو ابوها مش عايز فترة الخطوبة تطول عايز يعمل كل حاجه فى ليله واحده

طب و هو احنا حيلتنا حاجه لسه مش يستنى لما الواد يشتغل شوية و يعمل له كام جمعية على الاقل يدفع مقدم شقة

شقة ايه سعيد بيه حاجز لنورا شقه فى العمارة بتاعتهم

عروسة و شقة كمان انا الفار بيلعب فى عبى من الجوازة دى

بص برضه الوليه المخبولة فار ايه اللى هايلعب فى عبك دى البت زى القمر و ما شاء الله عليها محجبة يبقى عايزة ايه تانى

يعنى عشان موضوع الاستعجال ده و بعدين طالما هى كويسة كده كان ابوها بيدلل عليها ليه

يا ستى مش بيدلل كان عايز لها واحد ابن حلال ما هو ياما اتقدم لها ناس و ابوها كان بيرفض كان خايف يكونوا طمعانين فى البنت

لو على الطمع يبقى عنده حق ما هى قعدة الخزانه و لا جوازة الندامه

يبقى على بركة الله

بس باقولك ايه لازم طارق يجيب لعروسته شبكة حلوة و نساعد كمان فى الفرش بتاع الشقة عشان ابوها ما يقولش ان احنا كمان طمعانين فيه

طب و هانجيب فلوس الشبكة منين

القرشين اللى كنا شايلينهم لجهاز بسمة و هى لما ربنا يكرمها بعريس يبقى اخوها يجهزها ساعتها

من عينيا يا ماما و ربنا يخليكم ليا

و بسرعة تمت كل حاجه و فرشوا الشقة و حسين دفع كل اللى حيلته فى الشبكة و
فى الفرش و يوم الفرح كانت نورا زى القمر فى الفستان و الطرحة

عروستك قمر ربنا يهنيكم ببعض بصراحة حمار و حلاوة

فى ايه يا بابا ما تيجى تشيل انت اه و الله انا ممكن اقوم و حضرتك تيجى تشيل الليله كلها ما دام عاجباك قوى كده

اختشى يا ولا

و الله لو ما سكت يا بابا لاكون قايل لماما

ماشى يا طارق

الفرح خلص و المعازيم روحت و طارق و نورا دخلوا شقتهم

الف مبروك يا حبيبتى

الله يبارك فيك يا طارق

مالك متوترة كده ليه

لأ مفيش

طب تعالى افك لك الطرحه

لأ اطلع انت بره و انا هافكها و اغير هدومى

لأ طبعا ما ينفعش انا لازم افكها لك بنفسى

طب اوكى

طارق ابتدى يفك لنورا الدبابيس اللى فى الطرحة

و أن أن أن أن أن

نورا طلعت قرعه

يا نهار اسود ايه ده انتى قرعه

نورا سمعت كلمة قرعة و حولت على طارق عفش البيت كله و هو قعد يصرخ و باباها نزل جرى من شقته

فى ايه يا طارق انت عملت ايه فى البنت

عملت فيها ايه . انتوا ايه اللى عملتوه فيا ده مدينى عروسة قرعه

يا ابنى هى مولوده كده ما بيطلعلهاش شعر خالص

طب و حواجبها

ده تاتو

كمان تاتو طب و ما زرعتولهاش شعر ليه

ما نفعش حاولنا كتير بس ما نفعش

كل ده و نورا عماله تصوت و تكسر فى عفش البيت

اجرى بسرعه يا طارق هات لى البرشام اللى فى درج التسريحه

برشام ايه

مهدىء

مهدىء هى كمان مجنونه

نورا سمعت كلمة مجنونه و قامت على طارق و قعدت تضرب فيه

يا ابنى مش مجنونه ده شوية هيجان بسيط بيجولها لما حد بيعلق على موضوع شعرها

قصدك موضوع القرعة

نورا سمعت الكلمة زادت فى الصريخ

اخرس بقى و هات الموبايل لما اطلب الدكتور بتاعها ييجيى يشوفها

اطلبه انت انا مروح تعاليلى يا امه و طارق طلع يجرى و ساب لهم البيت

فى البيت التانى بقى حسين قاعد فى قمة سعادته

مش هاتقوم تنام يا حسين عشان الشغل

شغل ايه انا بافكر اخد بكرة اجازة و لا اقولك انا هاخد الاسبوع كله اجازة هو فيه حد هايحاسبنى ما خلاص بقى ناسبنا الحكومة

ايوه يا عم ماحدش قدك

الواد طارق ده طول عمره مبخت و حظه فى رجليه عروسة على الفرازة و مستقبل مضمون يعنى عيشة زى الفل

عقبال اخواته يا رب

ان شاء الله انا هاحاول انظر لهم على جوازات سقع زى جوازة طارق

ربنا يخليك لينا يا سونه

شوية و طارق قعد يخبط و يرن الجرس

ايه ده مين اللى هايجي لنا الساعه دى

ربنا يستر قوم افتح بسرعه يا حسين

طارق ايه اللى جابك يا ابنى

يا ضنايا ايه الدم ده مين اللى معورك كده يا حبيبى

العروسة

العروسة ليه انت عملت لها حاجه

عملت ايه مش حضرتك اللى قعدت تنق فيها حمار و حلاوة حمار و حلاوة اديها طلعت قرعه

طلعت قرعه يعنى ايه اوعى تكون تقصد !!!

لأ يا سيدى قرعه يعنى من غير شعر

يا نهار اسود

طب و فيها ايه ما تلبس باروكة و خلاص

باروكة ايه دى قرعه و مجنونه كمان

يا لهوى خلاص فى داهية الجوازة دى هو انا مستغنية عنك المرة دى عورتك المرة الجايه ايه هاتدبحك

انا هاطلقها

طلقها يا حبيبى بناقص الجوازة دى و ربنا يعوض علينا فى اللى صرفناه

هاتطلقها . شكلى كده هاخد اجازة على طول يا نعمه

ههههههههههههه

يا عينى عليه

حتة مقلب!!

تسلم ايديكى يا صافى

هههههههههههههههههههههههههههههههههههههههههههههههههه

يخربيت دي قصه
جاااااااااااااامده بجد

اه منكم انتو يا بناااات حواااا
مية من تحت تبن

هههههههههههههههههههههههههههههههه

احلى حاجه
قعدت تنق فيها حمار و حلاوة حمار و حلاوة اديها طلعت قرعه

تسلم ايدك عاشقه

هههههههههههههههههههههههههههه
يا عينى
تسلمى يا قمر
هو انتى صافى ؟؟؟؟

عروسة نقاوة حمار وحلاوة 368661_1308947935

نورتوا التوبيك

هههههههههههههههههههههههههههههه نااااااايس توبيك عروسة نقاوة حمار وحلاوة 4102628775

» احالة حمار الى القضاء
» تخيلى انك عروسة .......وفجأة