تخاريف عمرو . . . الجزء التاسع عشر

مساء الفل عليكم وع الناس اللى جنبيكم وع الناس اللى جنب جنبيكم وع الناس اللى كانت جنبيكم وع الناس اللى هتبقى جنبيكم

مساء الخير يامصر م الاخر يعنى

ها ايه الاخبار اخدتوا الاجازه .. وبقيتوا قايمين نايمين شاربين اكلين متفسحين وقارفنا

قارفنا ازاى بقى ( اسف عاللفظ طبعا ) ... تعالوا اقلكم قارفنا ازاى

الظاهره اللى معانا النهارده انتشرت جدا وبقت سمه من سمات الشاب الروش المدقدق والبنت الفرفوره الاموره وبتكتر اوى مع تجمعاتكم وخروجاتكم ...

يعنى افيدلنا احنا انكم تفضولوا ف بيوتكم ع طول

ايه هى الظاهره بقى ...!!

الشتيمه ...!!!

كان زمان لما حد يشتم حد بالام او الاب .. يالهوى تقوم الدنيا ومتقعدش (( كان ف ازمة كراسى بقى )) ويحصل خناقات

وقد تصل لمطاوى والسلاح زى ماحنا عارفين عادة بيطول .. وينتهى الفيلم ده بواحد ف المستشفى وواحد ف القسم وتنزل النهايه

والظاهر مع تغيير مواصفات السينما الحديثه اتغير الفيلم ده ؟؟؟!!

سامح :: متيلا ياله نخرج بعد القعده الوسخــ ده .....
مروان :: مالها القعده ياابن الــ .........
سامح :: ده امك انت ياله ....

وقد يتصور البعض ممن لسه عايشن ف القرن الماضى باخلاقياته الجميله بان الحوار ده هينتهى بالاتنين مقطعين بعض

فلاش بــاك ع المشهد تانى

مروان :: ماشى ياابن المشلضمه ... الله يرحم ابوك كان ... يلا نخرج
سامح :: يلا يامان هههههههههههههههههههههههههههههههه

احلى نهايه الصراحه يعنى هههههههههههههههههههههههههههه يااخى هـــع منك له بقى

.................................................. ............

ايه ده بجد حد يفهمنى طيب ده ازاى يعنى .. ده امك وده ابوك .. عايزين تشتموا اشتموا بعض يعنى اولعوا انتو الاتنين بجاز لكن امك وابوك وتنتهى .. بهههههههههههههههههههههههه

لا يبقى ف حاجه غلط .. سورى يعنى

.................................................. ..........

مها :: اسكتى اما البت نهى شفتها امبارح مع طارق ف الكافيه .. بنت المفكوكه كانت مظبطه
مى:: شوف البت بنت المحرومه .. اول موقعت ف طارق لزقتله يابنتى
مها :: الله يرحم ماجد يابت اللى يسمعك ميسمعش ايام مكنتى ... يابنت العبيطه
مى:: انا يابنت الهايفه .. اومال انتى بقى مع الواد زيزو كنتوا ايه .. خلى الواحد ساكت احسن

.................................................. .......

اه والنبى ياست مى اسكتى احسن وحياة ابوكى ياشيخه ..

طبعا بكده .. عرفنا ان الظاهره انتشرت ف البنات كمان بس بالفاظ اقل حده يعنى
بنت المفكوكه .. بنت المبعجره .. بنت اللئيمه .. بنت العوجه .. الــخ

الترتيب المنظقى للظاهره ..

ف البدايه انتشرت الظاهره بين الشباب بينهم وبين بعضيهم يعنى

ثم وبقدرة قادر بقت موجوده ف الاماكن العام

مش صعب انك تلاقى خمس شباب ف سكشن ف تالته طب فاتحين حوار ونصه كلام من ده

ثم انتشرت الظاهره بسرعه غريبه للبنات بينهم وبين بعضيهم

ثم بقت بين البنات ف الاماكن العامه عادى

فمن المحتمل جدا انك تلاقى تلات بنات قاعدين ف كافيه ومديينها كلام من ده
.
.
حاليا بقى .. بقت بين البنات والولاد هع

فمن الطبيعى جدا دلوقت انك تبقى قاعد ف النادى باحترامك وتسمع جروب ولاد وبنات زى العسل كده

احمد يشتم جيجى .. منى تسب الدين لمحمود .. معرفش مين يلعن ابو مين

عـــــــــــــــــــــــــــــــــــــــادى والله

لا مش عادى بقى ... كفايه .. كفايه بجد

اه نسيت اوضح ان الشتايم للاب والام قد تتعدى لشتايم انا مش ممكن حتى اشير ليها من بعيد .. مش بس اوصفها او اكتب مكانها نقط لا

بص بقى ياعم ...

من ناحية الدين طبعا حرام ده اكيد .. سب الدين اللى بقى ع لسان الرفيع قبل التخين ... وقذف الاهل بكلام ف القانون يعتبر سب وقذف

يعنى لو قلبت بجد بينك وبين صاحبك ف يوم وقفش عليك وراح قدم محضر هتتجرجر ياحلو ف قضية سب وقذف ع طول

بس القانون لسه محدش ادالوا خبر باللى بيحصل ده ... علشان يتلغى بقى السب والقذف ده مهو خلاص بقت عادى

اشته جدا ... ده دينيا وقانونيا

طب واجتماعيا .... انت بتاثر ف اللى جنبك واللى جنبك بيعلم اللى جنبه
وباذن الله 5 سنين وهنبقى شعب .. بيتباهى بالشتيمه لووووووووووول

مش هكدب ولا هقول انى متعلمتش من الكلام ده لا طبعا انا مش ملاك ولا نازل م السما

بقول برده بس مبقلش بالطريقه ده ..

والله ومعرفش بقيت بقول ازاى .. بس اهو الكلمه الوحيده اللى بقلها ياهايف هههههههه مش يابن الهايف

بيقولوا لاولادهم عليهم هيحصل ايه حتى لو ع سبييل الهزار بينهم وبين بعض

انتهينا ان الكلمات دى انتشرت ف المجتمع اسرع م انتشار السرطان ف الجسم

البنات بقت بتقول والاولاد بقت بتقول ... واللى اخره ياواتيه هههههههه

بس انا مضمنش العالم اللى اخرهم ياواتيه ده مهو برده بعد مكانت واطيه يعنى شتيمه وحشه جدا .. بقت

ياواتيه ومعناها عادى

مش بعيد كمان شهر برده كلمه زيها يتبدل فيها حرف وتبقى عادى برده .. مهو محدش ضامن يعنى

سيبك انك بتجرح اهلك بكلام

ياعم انت بتجرح اللى حواليك بالكلام ده .. ماشى صحابك اللى ف الشله متعوديين ع الكلام ده ... البنات

اللى واقفين معاك عادى بالنسبالهم الكلام ده اشته جدا

لكن لسه ف اولاد مش حابين يسمعوا الكلام ده .. وف بنات ااقل وصف ان فعلا بيجرحهم جدا الكلام ده

يعنى باذنك يارب .. هتاخد ذنب الناس اللى بتشتم فيهم ف غيابهم حتى لو ابنهم الراجل الطول بعرض ده

موافق ع الكلام

وهتاخد ذنب كل الناس اللى حواليك وبتأذيهم بكلامك ده ... يعنى اى خروجه هتخرجها يابطل شوف هتقول

فيها كام كلمه وهتاخد عليها كام ذنب

وان شالله محد حوش

الموضوع ده لاهو زى الحشيش اللى هيدمر عقول ... ولا هو زى هوس الفنانين اللى هيدمر اسره

لا ده هيدمر ذوق مجتمع .. ومش هنبقى بعد كده عارفين ايه الجميل وايه الوحش ايه الصح وايه الغلط

مهو كله عادى .. صبح صبح ياعم

ومبقاش لينا الحق نستغرب ع بحبك ياحمار ومش بعيد الصيف الجاى تبقى اشهر اغنيه عاطفيه ف السوق اسمها

بحبك يابنت الكلب .. ده انتى اللى جوا القلب .. لوول

بس انا عايز اسال سؤال فصيح شويه ...

افرض اللى قدامك فعلا يقصد الشتيمه اللى بيقولها ع اهلك ... انت هتعرف من فين اذ كان ده هزار عادى ولا بجد

مش بقلكم مش هنبقى عارفين ايه الجميل وايه الوحش

نور النور هنا بقى لو سمحت ...!!

بتقولوا الكلام ده ليه ؟؟ شايفينه بيدل ع الروشنه التكته والطأطه والطرئعه وما الى ذلك من كلام انا مش فهماله معنى اصلا

ازاى تقبل ع اهلك يتقال عليهم كلام زى ده .. حتى لو ع سبيل الهزار زى ماقلنا .. ايه يااخى ده كانت خلفت خروف افيد والله .. فين الدم فين النخوه

فيـن فيـن فيـن

ذهبوا مع الريح..!!

ولا ذهبوا مع العولمه ..!! ولا مع الروشنه ..!!

ولا ده اولى تنازلات الزمن القادم ..!!

وسلملى ع المبادىء ..!! مش كده ولا ايه ..!!

رجاء المشاركه وقول انت شايف الظاهره ده ازاى ؟؟؟

عندك حق والله ياعمور دي بقت حاجه اخر قلت ادب والاهالي الي قاعده بتتشتم
دي ملهاش ذنب غير انها تعبت واتبهدلت عشان تربيهم وتخليهم بني ادمين بس للاسف بني
ادمين ميستهلوش اي حاجه

تخاريف عمرو . . . الجزء التاسع عشر 2542961062

شكرا لاضافتك الجميلة نور

اسعدنى مرورك دائما

اكيد ياعمرو اللى بتقوله صح

بس اكيد بردو الكلام ده بين الولاد بس البنات طبعا لالالالا

فاكر انه بكدا بقا كوووووول بجد حاجه مش حلوه خالص

ياريت يتقوا ربنا فى اهلهم بقا ويحترموا نفسهم

ازاى قابل على نفسك حد يشتم اهلك وعاوز تبقى محترم فى عيون الناس

ده انت اصلا مش محترم نفسك ياريت يفوقوا بقااا

تسلم ياعمرو مواضيعك دايما قمه الابداع

وانا بتابعهم تخريفه تخريفه ولو انه كلام عين العقل

تخاريف عمرو . . . الجزء التاسع عشر 1568131544

تخاريف عمرو . . . الجزء التاسع عشر 1568131544

على فكرة لوللا انا لما بطرح ظاهرة

بتبقى عن تجربة وانى شوفتها بعينى

يعنى الكلام دا انا شوفته فى بنات وعدد مش قليل كمان

وفى الشارع والله كمان مش بينهم وبين بعضهم

نورتينى لوللا وشكرا لأضافتك الجميلة

وربنا يهدى بنات المسلمين

فيه بنت تشتم بالكلام ده اصلا وتقول الفاظ زى كدا ؟؟؟

معرفش البنات دى انت والامبراطور بتشوفوهم فين ههههه

ربنا يهدى الكل

للاسف يالولا انا سمعت كدة فعلا من بعض البنات مع بعض وكانوا فى قمة قلة الادب وانا كنت وقتها فى ذهول
بس للاسف على رايك يامورا بقت ظاهرة حديثة وربنا يبعدنا عنها ونقدر اننا نقضى عليها
عشان حال البلد يرجع يتصلح تانى وشبابنا يبقوا احسن شباب
وميرسى يامورا على الطرح الجميل دووون

تسلمى ريهام على مرورك واضافتك الجميلة

بحييكى على تولك الدائم والرائع

اللى اتمنى انك مش تحرمينا منها ابدا

صح كلامك يا عمرو وفعلا فيه ناس بيتهيأ لها ان دى لغة العصر والموضة
لكن الاخلاق مهما اتغير الزمن عمرها ما هتتغير

تخاريف تجنن وتسلم ايديك بجد

» تخاريف عمرو . . . الجزء التاسع
» تخاريف عمرو . . . الجزء الاول
» تخاريف عمرو . . . الجزء الخامس
» تخاريف عمرو . . . الجزء الثانى
» تخاريف عمرو . . . الجزء الثالث